Երևանում բացվեց իր տեսակով եզակի «Էրեբունի» ռադիոթերապիայի կենտրոնը

«Էրեբունի» բժշկական կենտրոնն ամերիկյան Varian առաջատար ընկերության հետ համատեղ կառուցել է իր տեսակով եզակի ճառագայթային բուժման կենտրոն, որը հագեցած է ճառագայթային թերապիայի, ռադիովիրաբուժության և ռադիոիզոտոպային վերջին սերնդի սարքավորումներով: 
Բարորակ և չարորակ նորագոյացություններ ունեցող պացիենտներին արմատական բուժման ծառայություններ առաջարկող «Էրեբունի» ռադիոթերապիայի կենտրոնի բացման արարողությանը, որը տեղի ունեցավ սեպտեմբերի 13-ին, ներկա էին նաև ՀՀ վարչապետ Նիկոլ Փաշինյանը, ՀՀ Առողջապահության նախարարը, առողջապահական ոլորտի պատասխանատուներ և ներկայացուցիչներ, արտասահմանցի գործընկերներ։
 
ՀՀ առողջապահության նախարարի գնահատմամբ՝ ռադիոթերապիայի կենտրոնի շնորհիվ Հայաստանում հասանելի են դառնում նորագոյացությունների բուժման հիմնական ծառայությունները։ 

«Սա արդյունքն է պետություն-մասնավոր հատվածի համագործակցության, որովհետև մեր քաղաքականությունն է մշակել ստանդարտներ, ներդնել նոր ծառայություններ, պետական պատվերով գնել այդ ծառայությունները քաղաքացիների համար։ Բացի այդ, ես նկատում եմ, որ ապահովագրության ներդրման գործընթացը խթանել է, որպեսզի մասնավոր հատվածը ներդրումներ  անի, ապահովում՝ ժամանակակից ծառայություններ։ Միայն այս երկու գործընկերների լավ համագործակցությամբ կարող ենք լավ արդյունքի հասնել»,- ասաց Ավանեսյանը՝ հավելելով, որ նորաբաց բուժհաստատությունը ակտիվ համագործակցելու է Ֆանարջյանի անվան ազգային ինստիտուտի հետ, որովհետև անհրաժեշտ իզոտոպների գնումը նաև պետական հիմնարկից է իրականացվում։
Կենտրոնում առկա են Varian ընկերության վերջին սերնդի Halcyon, Edge, Bravos ռադիո և բրախիթերապևտիկ արդիական սարքավորումներ, գերմանական Siemens Healthineers ընկերության, նորագույն Somatom go.Open Pro ճառագայթային պլանավորման համար նախատեսված տոմոգրաֆ, ինչպես նաև Siemens Biograph mCT 64 PET scan պոզիտրոն էմիսիոն համակարգչային տոմոգրաֆ:

«Էրեբունի» ռադիոթերապիայի կենտրոնն առանձնանում է նաև ժամանակակից ռադիովիրաբուժությամբ:
Ռադիովիրաբուժությունը բժշկական միջամտության տեսակ է, որը թույլ է տալիս իրականացնել բարորակ և չարորակ նորագոյացությունների, ինչպես նաև այլ ախտահարումների ճառագայթային բուժում` արմատապես վերացնելով ուռուցքածին բջիջները:

Բարձր որակավորում ունեցող մասնագետներն ունեն միջազգային փորձ և բազմաթիվ վերապատրաստումներ։ Նրանցից շատերը հրավիրված են արտերկրից:
Բացման հանդիսավոր արարողությունից հետո ՀՀ վարչապետ Նիկոլ Փաշինյանը և ներկաները շրջայց կատարեցին կենտրոնում՝ ծանոթանալով ստեղծված պայմաններին ու սարքավորումների հնարավորություններին։