Ga-68 PSMA PET/CT (ՊԷՏ/ՀՏ) հետազոտություն

Ի՞նչ է ՊԷՏ/ՀՏ հետազոտությունը։
ՊԷՏ/ՀՏ-ն՝ Պոզիտրոն Էմիսիոն Տոմոգրաֆիան և Համակարգչային Տոմոգրաֆիան, ռադիոնուկլիդային ախտորոշման մեթոդ է, որը թույլ է տալիս գնահատել ֆունկցիոնալ առանձնահատկությունները՝ ներքին օրգանների նյութափոխանակությունը և պաթոլոգիական փոփոխությունները՝ օգտագործելով պոզիտրոնային էմիսիոն տոմոգրաֆիան, ինչպես նաև անատոմիական կառուցվածքը՝ համակարգչային տոմոգրաֆիայի մեթոդով։
 

Ինչպե՞ս նախապատրաստվել հետազոտությանը։
Հետազոտության նախատեսված ժամից 4 ժամ առաջ անհրաժեշտ է
բացառել սննդի ընդունումը։
Բուժկենտրոն այցելությունից 1–2 ժամ առաջ անհրաժեշտ է խմել 1 լիտր
ջուր։
 

Ի՞նչ վերցնել ձեզ հետ հետազոտության օրը։
• Անձնագիր կամ ID քարտ
• PSA անալիզի արդյունք՝ կատարված ոչ ավելի քան 30 օր առաջ
• Նախկինում կատարված հետազոտությունների սկավառակները և նկարագրությունները՝ ՊԷՏ/ՀՏ (PET/CT), ՍՊԷԿՏ/ՀՏ (SPECT/CT), ՀՏ (CT), ՄՌՏ (MRI), ուլտրաձայնային հետազոտություն և այլն
• Այլ բժշկական փաստաթղթեր՝ էպիկրիզներ, մասնագետների եզրակացություններ, ամբուլատոր քարտ
 

Ինչպե՞ս է անցկացվում հետազոտությունը։
Պետք է բաժանմունք ներկայանալ ադմինիստրատորի կողմից նշված ժամին։
Ընդհանուր պրոցեդուրայի համար նախատեսեք բուժկենտրոնում գտնվել մոտ 2 ժամ։
Անհրաժեշտ է կրել հարմարավետ հագուստ՝ առանց մետաղական տարրերի։
Անհրաժեշտ փաստաթղթերը լրացնելուց հետո ձեզ կտեղափոխեն ներարկման սենյակ, որից հետո կսկսվի պրոցեդուրան։
 

Հիվանդասենյակում / նախապատրաստման սենյակում
Դուք ընդունում եք հարմարավետ դիրք, որից հետո տեղադրվում է ներերակային կաթետեր։
Ձեզ ներարկվում է Ga-68 PSMA ՌՖՊ՝ ռադիոֆարմպրեպարատ։
Հանգստի սենյակում խորհուրդ չի տրվում խոսել, երաժշտություն լսել, կարդալ կամ օգտագործել բջջային հեռախոս։
ՌՖՊ-ի ներարկումից 1 ժամ հետո ձեզ կուղեկցեն ՊԷՏ/ՀՏ հետազոտման սենյակ։ Սկանավորումից առաջ անհրաժեշտ է դատարկել միզապարկը։
Հետազոտությունը տևում է 15–20 րոպե։ Այդ ամբողջ ընթացքում պետք է հանգիստ պառկել՝ առանց շարժվելու։ Սկանավորման ընթացքում շարժումը կարող է հանգեցնել արտեֆակտների առաջացման, որոնք կարող են դժվարացնել կամ անհնար դարձնել հետազոտության արդյունքների ճիշտ նկարագրությունը։
 

Ինչպե՞ս վարվել հետազոտությունից հետո։
Հետազոտությունից հետո 12 ժամվա ընթացքում անհրաժեշտ է՝
• Բացառել շփումը փոքր երեխաների՝ 10 տարեկանից փոքր, և հղի կանանց հետ։ Եթե շփումը բացառել հնարավոր չէ, անհրաժեշտ է նրանցից պահպանել նվազագույնը 2 մետր հեռավորություն։ 12 ժամվա ընթացքում տեղի է ունենում ներարկված ռադիոակտիվ նյութի ամբողջական տրոհում, որից հետո դուք այլևս չեք լինի ճառագայթման աղբյուր։
• Ավելացնել օգտագործվող հեղուկի ծավալը մինչև 2–2,5 լիտր։ Ռադիոակտիվ նյութը դուրս է գալիս երիկամներով՝ մեզի հետ միասին։
• Բացառել ալկոհոլային խմիչքների օգտագործումը։
• Եթե պլանավորում եք հետազոտությունից հետո 24 ժամվա ընթացքում դուրս գալ հանրապետությունից կամ հատել հանրապետության սահմանը, անհրաժեշտ է տեղեկացնել անձնակազմին համապատասխան փաստաթուղթ ստանալու համար՝ տեղեկանք ռադիոնուկլիդային ախտորոշման մասին։ Տեղեկանքը անհրաժեշտ է ներկայացնել սահմանին։
 

Ինչպե՞ս ստանալ հետազոտության արդյունքը / եզրակացությունը։
ՊԷՏ/ՀՏ-ի արդյունքները պատրաստ կլինեն երկու աշխատանքային օրվա ընթացքում։ Բնօրինակ արձանագրությունը, հետազոտության ձայնագրման սկավառակը և QR կոդը տրվում են Ճառագայթային թերապիայի կենտրոնի ընդունարանում՝ երկուշաբթիից ուրբաթ, ժամը 09:00-ից մինչև 17:00-ն ընկած ժամանակահատվածում։
Վերոնշյալ նախապատրաստման կանոններին հետևելը թույլ է տալիս իրականացնել որակյալ հետազոտություն և նվազեցնել կեղծ դրական ու կեղծ բացասական արդյունքների ռիսկերը, որոնք կարող են կապված լինել ոչ պատշաճ նախապատրաստման հետ։