Կրծքագեղձի քաղցկեղի ճառագայթային բուժում
Կրծքագեղձի քաղցկեղի բուժման փուլերից մեկը ճառագայթային թերապիան է, որը սովորաբար իրականացվում է վիրահատությունից և դեղորայքային բուժումից հետո։ Այն հանդիսանում է կարևոր փուլ, որն ուղղված է ուռուցքային բջիջների ոչնչացմանը և հիվանդության կրկնության կանխարգելմանը։
Ի՞նչ է ճառագայթային թերապիան
Ճառագայթային թերապիան իոնիզացնող ճառագայթման միջոցով ազդում է ուռուցքային բջիջների վրա՝ դրանք ոչնչացնելու նպատակով։ Այն հիմնականում կիրառվում է այն դեպքերում, երբ վիրահատական միջամտության ժամանակ իրականացվել է օրգան պահպանողական վիրահատություն (այսինքն՝ կուրծքը ամբողջությամբ չի հեռացվել)։ Բացի այդ, այն օգտագործվում է նաև մաստեկտոմիայից (կրծքագեղձի ամբողջական հեռացումից) հետո՝ հատկապես հիվանդության ուշ փուլերում։
Բուժման պլանավորում
Ճառագայթային թերապիայի սկսվելուց առաջ իրականացվում է ԿՏ-տոպոմետրիա, որի ընթացքում ստացված պատկերների հիման վրա ձևավորվում է բուժման պլանը։ Այս գործընթացը ներառում է թիրախային հատվածի (կրծքագեղձի) և հարակից առողջ հյուսվածքների՝ թոքերի, սրտի, ողնուղեղի եզրագծում և ճառագայթային դոզայի հաշվարկ։
Բուժման պլանավորման հիմնական նպատակը մաքսիմալ ճշգրտությամբ հաշվարկել ուռուցքի շրջանում անհրաժեշտ ճառագայթային դոզան՝ միաժամանակ պաշտպանելով շրջակա առողջ հյուսվածքները։
Պլանավորման փուլը տևում է մոտ մեկ շաբաթ, որից հետո սկսվում է ճառագայթային բուժումը։
Բուժման ընթացքը
Ճառագայթային բուժման սեանսների քանակը կախված է հիվանդության փուլից և նախորդող վիրահատության ծավալից, սակայն միջինում կազմում է 16-20 սեանս, որոնք իրականացվում են ամենօրյա ռեժիմով։
Հինգօրյա ռեժիմը (երկուշաբթիից ուրբաթ) միջազգային ստանդարտ է, իսկ շաբաթ-կիրակի օրերին պացիենտին տրամադրվում է ընդմիջում, որպեսզի հարակից առողջ հյուսվածքները վերականգնվեն։
Ճառագայթային թերապիայի ամենօրյա սեանսի տևողությունը 10-15 րոպե է, որից բուն ճառագայթումը տևում է միայն 1-2 րոպե։ Մնացած ժամանակը հատկացվում է պացիենտի ճիշտ դիրքավորմանը։
Ժամանակակից տեխնոլոգիաների կիրառումը
«Էրեբունի» ռադիոթերապիայի կենտրոնում կրծքագեղձի ճառագայթումը իրականացվում է խորը ներշնչման փուլում, երբ պացիենտը պահում է շնչառությունը։ Այս մեթոդը թույլ է տալիս նվազեցնել ճառագայթային ազդեցությունը սրտի և թոքերի վրա։ Հետազոտությունները ցույց են տվել, որ նախկինում կիրառվող մեթոդների դեպքում պացիենտները հետագայում բախվում էին սրտաբանական խնդիրների, ինչը պայմանավորված էր սրտի վրա ճառագայթման ազդեցությամբ։
Խորը ներշնչման տեխնոլոգիայի շնորհիվ սրտի դիրքը փոփոխվում է, այն հեռանում է կրծքագեղձից, ինչի արդյունքում ճառագայթման ազդեցությունն այդ օրգանի վրա նվազում է։ Բացի այդ, մեծանում է թոքերի ծավալը, ինչը նույնպես նվազեցնում է ճառագայթային ազդեցությունը։
Կողմնակի ազդեցություններ և կանխարգելում
Ժամանակակից տեխնոլոգիաների կիրառումը նվազեցնում է նաև կողմնակի ազդեցությունների հավանականությունը։ Պացիենտների մոտ երբեմն կարող է նկատվել մաշկի թույլ կարմրածություն, որը կարելի է մեղմել ճիշտ խնամքով։ Բացի այդ, ավշային հանգույցների ճառագայթման դեպքում հնարավոր են թեթև լարինգիտի երևույթներ, որոնք կհսկի բուժող բժիշկը համապատասխան խորհրդատվությամբ։
Այս կողմնակի ազդեցությունները վտանգավոր չեն և բուժման ավարտից 2-3 շաբաթ անց ամբողջությամբ վերանում են։
Կյանքի որակը բուժման ընթացքում
Բուն ճառագայթային բուժման ընթացքը, որը «Էրեբունի» ռադիոթերապիայի կենտրոնում իրականացվում է ժամանակակից արագացուցիչներով, որևէ տհաճ զգացողություն չի առաջացնում։ Ի տարբերություն քիմիաթերապիայի՝ այն չի ուղեկցվում թուլությամբ կամ սրտխառնոցով։
Ճառագայթային թերապիայի ընթացքում պացիենտները կարող են վերադառնալ իրենց առօրյա կյանքին, իսկ բուժման ավարտից հետո՝ վերականգնվել առանց երկարաժամկետ բարդությունների։ Բացի այդ, նրանք որևէ վտանգ չեն ներկայացնում շրջապատի համար և կարող են շարունակել շփվել իրենց հարազատների հետ։
Կրծքագեղձի քաղցկեղի ճառագայթային թերապիան կարևոր փուլ է, որը կարող է նշանակալիորեն բարձրացնել բուժման արդյունավետությունը։ «Էրեբունի» ռադիոթերապիայի կենտրոնում կիրառվում են միջազգային ստանդարտներին համապատասխան տեխնոլոգիաներ, որոնք ապահովում են բուժման անվտանգությունն ու բարձր արդյունավետությունը՝ նվազեցնելով հնարավոր բարդությունները և բարելավելով պացիենտների կյանքի որակը։